Albin Kurti, kryeministri në detyrë i Kosovës, Albin Kurti i është përgjigjur kryeministrit shqiptar Edi Rama lidhur me një batutë të këtij të fundit për hapjen e kufirit duke thënë se në Kosovë nuk di me kë të bisedojë.
Kurti është shprehu se pavarësisht zhvillimeve politike në Kosovë, ai është ende kryeministër në detyrë në këtë shtet dhe mund të bisedojë për çdo gjë që ka lidhje me vendin që ai drejton.
Po ashtu, ai ka thënë se ka biseduar me ambasadorin e Shqipërisë në Kosovë, Qemal Minxhozin për çështjen e hapjes së kufijve.
“Unë nuk e kam parë atë emision, por ne jemi të interesuar që sapo të krijohen sado pak kushtet të bëjmë këtë hapje të kufirit, por duhet ta dini që vendimet tona, masat tona nuk janë politike e as demokratike, sa janë shkencore, sepse bazohen në rekomandimet e Institutit Kombëtar të Shëndetësisë publike. Unë jam kryeministër në detyrë dhe për këtë nuk kam dilema, kush ka dilema duhet të pyeten ata, nuk duhet të pyetem unë. Dje kam takuar Ambasadori e Shqipërisë, Qemal Minxhozi kemi diskutuar për shumë çështje duke përfshirë edhe atë të kufirit”,- u shpreh Kurti./ Opinion.al
