Policia ka arrestuar këtë të shtunë bashkëshortin e Merushe Gjuzit, gruas që një ditë më parë hapi derën e furgonit në lëvizje e sipër dhe u hodh, e si pasojë humbi jetën.
Uniformat blu bëjnë me dije se pas hetimeve të thelluara për rastin, është vënë në pranga M. Gj., 68 vjeç, i cili akuzohet për veprat penale “Dhuna në familje” dhe “Shkaktimi i vetëvrasjes”.
Nëpërmjet dhunës psikologjike të ushtruar ndaj bashkëshortes së tij, 68-vjeçari dyshohet se ka ndikuar te gjendja e rënduar psikologjike e saj, e cila në këto kushte, është vetëhedhur nga furgoni.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
