Me aktivitete të shumta të organizuara në qendër të qytetit dhe në Parkun Kombëtar të Shebenikut, bashkia e Librazhdit ka hapur zyrtarisht sezonin turistik malor.
Gjatë aktiviteteve u prezantuan destinacionet e shumta turistike, kulturore, historike dhe të kulinarisë në këtë bashki.
Të shumtë ishin banorët e zonës dhe turistët që morën pjesë në hapjen e siparit turistik, duke përfituar edhe nga pushimi i fundjavës.
Gjithashtu pjesë e aktivitetit ishte edhe kryetari i bashkisë së Librazhdit, Mariglen Disha.
Një nga premtimet e bëra nga kryetari i bashkisë është shndërrimi i kësaj zonë në një prej destinacioneve më të rëndësishme të Turizmit Malor në Shqipëri.
Kryebashkiaku Disha u shpreh se qyteti I Librazhdit ka potenciale dhe resurse natyrore mjaft të mëdha mes të cilave turistët mund të zgjedhin për të vizituar destinacione të tilla si Rruga Egnatia, një nga 12 rrugët më të famshme të kohës antike.
Rruga Egnatia përshkon mes për mes disa fshatra të Librazhdit përgjatë luginës së Shkumbinit ku ka gjurmë të freskëta të saj në segmente me gjatësi jo të vogla.
Po kështu përveç Rrugës Egnatia dhe Parkut Kombëtar të Shebenikut janë destinacione po kaq të famshme edhe Kisha Eremite e Kosharishtit, Shpella e Akullit në Letëm, Liqenet Akullnajore të Shebenikut e shumë monumente kulture, monumente historike e monumente natyre.
Librazhdi vlerësohet gjithashtu edhe për shumëllojshmërinë e bimësisë, luleve e pyjeve dhe cilësohet nga të huajt si një parajsë e vogël e gjelbërimit dhe burimeve ujore.
Prandaj rekomandohet si një destinacion i rëndësishëm i Turizmit Malor ku fshatrat Xhyrë, Dardhë, Hotolisht, Fushë Studën, Polis, Qarrishtë e plot të tjerë tashmë janë nga më të vizituarit nga të huajt dhe fluksi i turistëve drejt tyre po rriten jashtëzakonisht nga muaji në muaj.
Për shkak të zgjerimit të ofertës turistike veç Parkut Kombëtar të Shebenikut vizitorët do orientohen edhe drejt destinacioneve të tjera malore, monumenteve natyrore dhe siteve të trashëgimisë kulturore.
