Është hapur këtë të mërkurë një tjetër segment i Rrugës së Arbrit. Bëhet fjalë për aksin Klos-Bulqizë që tanimë përshkohet në vetëm 10 minuta dhe shmang qafën e Buallit, një nga pikat me rrezikshmërinë më të lartë në këtë aks.
Aktualisht po punohet vetëm në 300 metrat e fundit të tunelit të Murrizit, i cili sipas kryeministrit Rama, për shkak të gjeologjisë ka krijuar shumë vonesa.
“Hapet edhe segmenti rrugor Plani i Bardhë-Qafa e Buallit, i cili vonoi për shkak të gjeologjisë së terrenit dhe tanimë jo vetëm do të shkurtojë më tej kohën e udhëtimit Tiranë – Dibër, por do të rrisë në standardet optimale sigurinë rrugore.
Durim edhe për 300m e fundit në Tunelin e Murrizit, ku ecet përditë po ngadalë deri në daljen që e mbyll përfundimisht këtë vepër të madhe infrastrukturore, e cila ka nisur të kthehet një motor i fuqishëm i zhvillimit ekonomik të gjithë kësaj zone të bekuar”-shkruan kryeministri Rama në “Facebook”.
