Në Komisionin Qendror të Zgjedhjeve u hapën sot më 4 Qershor katër kuti votimi të Qarkut të Vlorës pas kërkesës së Partisë Demokratike. Nga hapja e tyre, rezultuan 2233 fletë votimi të papërdorura në kuti, nga zero që ishin shënuar në procesverbale. Partia Demokratike pretendon se në raport me raportimin që ka bërë Komisioni i Qendrës së Votimit, dalin 417 fletë votimi të papërdorura më shumë sesa kanë raportuar. Vendimi për hapjen e kutive u mor të martën e 3 Qershorit nga Komisioni i Ankimimeve dhe Sanksioneve me pretendimin se ka pasur manipulime sa i takon fletëve të votimit të papërdorura.
Përfaqësuesi i PD-së në KQZ, Franc Nuri, përzgjodhi kutitë që do të hapen të cilat ishin:
Kutia 4515/00 për Bashkinë e Vlorës
Kutia 4528/00 për Bashkinë Selenicë
Kutia 4664/01 për Bashkinë e Sarandës
Kutia 4714/00 për Bashkinë e Finiqit.
Kujtojmë se Partia Demokratike kërkoi këqyrjen e 43 kutive në Qarkun e Vlorës, por kjo u refuzua nga KAS pasi nuk kishte lidhje “me objektin e kërkesës ankimore për pavlefshmërinë e zgjedhjeve në Qarkun Vlorë”. Partia Demokratike akuzon se mungojnë rreth 130 mijë fletë votimi të papërdorura. Sipas tyre mund të jenë përdorur për manipulime të ndryshme gjatë procesit zgjedhor.
