Pas deklaratës së një deputeti gjerman se grupi parlamentar më i madh në vend, CDU/CSU nuk do të votojë për hapjen e negociatave me Shqipërinë, në median shqiptare kanë qarkulluar kaq shumë lajme.
Por nëse i hedh një sy medias gjermanishtfolëse, të bie në sy vetëm një deklaratë që ka lidhje me këtë çështje.
Deklarata është publikuar nga Agjencia Austriake e Lajmeve dhe është bërë nga deputeti Michael Hammer.
Hammer është deputet i Partisë Popullore Austriake, një nga dy partitë kryesore në vend, e krahut të djathtë dhe anëtare e Partisë Popullore Europiane.
Hammer, që drejton edhe grupin e miqësisë mes Austrisë dhe Shqipërisë, përsërit se hapja e negociatave do të bëhet pasi të jeni plotësuar disa kushte.
Sipas tij, shqetësim kryesor mbetet çështja e kanabisit.
“Veçanërisht problemi i kultivimit dhe trafikut të drogës duhet të zgjidhet nga qeveria Rama dhe autoritetet përkatëse në mënyrë urgjente. Qeveria duhet të refuzojë qartësisht të tilla praktika, në mënyrë që të ndryshojë imazhi ndërkombëtar për vendin. Ky problem është një pengesë shumë e rëndësishme për fillimin e negociatave. Këtu qeveria Rama duhet të ndërmarrë hapa për të zgjidhur çështjen. BE duhet të monitorojë nga afër këtë zhvillim,” tha Hammer./Mapo
