Kandidati për kryetar të Prishtinës nga Lëvizja Vetëvendosje, Hajrulla Çeku, në një intervistë me gazetarin Blendi Fevziun në emisionin “Opinion” në Tv Klan tha se ka ardhur koha për ndryshim në kryeqytetin e Kosovës.
Çeku u shpreh se partitë politike në Kosovë, që kanë menaxhuar qytetet, kryesisht kanë kontribuuar në degradimin e qendrave urbane.
Ai tha se beson se Vetëvendosje do e ndryshojë Prishtinën. Çeku nënvizoi se do ta ruajë trashëgiminë kulturore.
Hajrullah Çeku nga Vetëvendosje, kandidat për kryetar i Prishtinës: Unë besoj se ka ardhur koha për ndryshim në Prishtinë. Unë politikën e kam nisur në Shqipëri, ku kryeministri Edi Rama më thirri për një takim, për të bërë diçka për një projekt për bashkëpunim Shqipëri-Kosovë. Atje iu bashkova qeverisë. Kisha pak skepticizëm, sepse nuk isha marrë pjesë me politikë. Rama më kërkoi angazhim profesional. U bëra zv/ministër i Turizmit dhe për një vit e gjysmë kam shërbyer në qeverinë shqiptare, në kabinetin “Rama 2”. Më 2019 u bëra pjesë e Vetëvendosjes dhe në zgjedhje u zgjodha deputet i parlamentit të Kosovës. Në Shqipëri kam njohur territorin, sepse ne nga Kosova njohim vetëm një pjesë të vendit atje. Jam impresionuar kryesisht nga jugu i Shqipërisë. Sot, Prishtina ka mundësi të shpëtojë nga degradimi, që i ka nisur. Vetëvendosje është e vetmja platformë që mund ta çojë përpara zhvillimin në Prishtinë. Shumë parti politike që kanë menaxhuar qytetet e Kosovës kanë kontribuar në degradimin e qyteteve. Do bëj gjithçka, që të ruaj trashëgiminë kulturore. Jo vetëm ruajtje identiteti, por do shohim masa konkrete ekonomike. Unë besoj se kryetari aktual Përparim Rama prioritet ka pasurimin personal dhe nuk ka prioritet qytetarët e Kosovës e përmirësimin e cilësisë të jetës së tyre. Ne si Vetëvendosje kemi prioritetet qytetarin e Republikës së Kosovës.
Kryetari aktual i Prishtinës Përparim Rama dhe Hajrullah Çeku ishin më të votuarit në raundin e parë zgjedhor, duke shkuar në raundin final. Qytetarët e Prishtinës do vendosin më 9 nëntor se kush do jetë i pari i kryeqytetit.
