Rudina Hajdari ka zhvilluar një replikë me Ministrin e Jashtëm në detyrë, Gent Cakaj në mbledhjen e Komisionit të Jashtëm. Hajdari e ka pyetur lidhur me shkarkimin e 20 punonjësve të shërbimit diplomatik. Hajdari iu referua edhe fjalëve të Ditmir Bushatit, i cili kur u largua tha se po lindte një shërbim diplomatik ambicioz, ku kishte forcuar meritokracinë.
“Rreth 20 punonjës, ndoshta më shumë, për shkak se këta punonjës nuk plotësojnë kushtet ligjore apo profesionale, keni vendosur t’i shkarkoni. Ndërkohë, nuk publikuar asnjë vendim i arsyetuar. Këtë mund ta bëj edhe në linjë zyrtare, përse e keni bërë pa asnjë arsye, sipas ligjit mund të kërkojmë informacion. Duke cenuar të drejtën e punës cenon cilësinë, cenon pavarësinë dhe njëkohësisht cenon shërbimin diplomatik. Pika e dytë, pse ish-ministri Bushati në fjalën përmbyllëse ka thënë: “Forcuam meritokracinë duke përmirësuar rrënjësisht sistemin e rekrutimit në shërbimin e jashtëm, mbi bazën e aftësive”. Çfarë ndodhi me këta 20 punonjës? Pse nuk na keni dhënë një arsye për këta 20 punonjës, sepse për mendimin tim mund të jetë deklaratë e radhës për një reformë fiktive”, tha gjatë fjalës së saj Rudina Hajdari.
Në përgjigjen e tij Cakaj sqaroi se nuk bëhet fjalë për 20 shkarkime nga puna. “Citimi i deklaratës sime nuk ishte i saktë, për shkak se thatë se kam vendosur të shkarkoj 20 punonjës. Unë kam thënë me një pjesë do të shkëputet marrëdhënia e punës, me pjesën tjetër do t’i transferojmë, e kjo reformë prek rreth 20 vetë, nuk kemi të bëjmë me 20 lirime nga puna”, u shpreh ai.
Më tej Cakaj tha se nismat e tij janë në vazhdim të punës së ish-ministrit Ditmir Bushati.
“Unë pres mbështetje nga ju, sepse jeni një opozitare shumë konstruktive, kjo nuk është reformë, as cenim, është përpjekje për ta rritur performancën dhe një reformë substanciale për shkak se në përfaqësitë tona në botë ka mospërputhje mes burimeve njerëzore dhe rezultateve. Deklarata e Bushatit është krejtësisht legjitime, ministri ka bërë një punë të vlefshme dhe prej vizionit të tij Shqipëria është në pikën më të lartë diplomatike, dhe fjala ime nisi pikërisht duke vlerësuar punën e tij. Unë jam pjesë e asaj ministrie, por jam i gatshëm të ndërmarr reforma për të përmirësuar situatën që të rinjtë me rezultate maksimale të bëhen pjesë e strukturës diplomatike. Me sjelljen e tyre disa kanë tejkaluar sjelljen dinjitoze, për një pjesë ka masa disiplinore dhe një pjesë e tyre kanë qenë në sistem tepër gjatë dhe kanë kontribute shumë të pakta”, u shpreh Cakaj./Opinion.al
