Deputetja e Partisë Socialiste, Mimoza Hafizi ka denoncuar pushimin nga puna të një mësueseje matematike në rrethin e Peshkopisë, pasi ajo u bë pjesë e levizjes; “Shqipëria mbi partinë”.
Hafizi shkruan në facebook se mësuese Mandarina Kaca jep mësim prej 21 vitesh matematikë për nxënësit e Peshkopisë.
Ajo bën me dije se Kacaj është shkolluar e diplomuar në degën matematikë, Fakulteti Shkencave të Natyrës, Universiteti i Tiranës. Ka qenë mësuese në shkollën e mesme e tani në shkollën nëntëvjeçare “Demir Gashi”.
“ E njoh prej disa javësh, kur u bashkua me ne në betejën për një politikë tjetër të Shqipërisë mbi Partinë. Ishte në ballë të bashkëbisedimit që organizuam në Peshkopi në muajin Prill. Para pak ditësh Mandarinës i komunikuan largimin nga puna.”, shkruan Hafizi.
Arsyeja e largimit, sipas saj, është bashkimi me lëvizjen politike ku deputeti Ben Blushi, Mimoza Hafizi dhe disaj personalitete të tjerë të së majtës në Shqipëri po organizojnë në disa rrethe të Shqipërisë.
“Preteksi: një proces i stisur anketimi, përmbyllur me një vendim të shkruar pa respekt për gjuhën shqipe. Vendimin shiheni vetë, e keni bashkëlidhur.”, shkruan ajo.
Hafizi thekson se ky është sistemi politik i ngritur prej 25 vitesh dhe që po ia merr frymën Shqipërisë.
“Sistem ku shteti përdoret për interesa politike e korruptive, sistem ku shteti parcelizohet në duar deputetësh që sillen si bajraktarë, sistem ku pushteti mbahet përmes dhunës dhe frikës. Tentuam ta ndryshonim në 2013, por Rilindja e dështoi çdo përpjekje”, shkruan ajo.
Ndërsa, thekson se përditë na ndodh që njerëz na takojnë apo na shkruajnë se duan të na bashkohen, por kanë frikë!
“Që të mos e pësojnë si mësuese Rina. Që të mos i ndodhë siç parashikoi e reja Flogerta Krypi për prindërit e vet, kur denoncoi pikërisht këtë dhunë në një takim me ambasadorë para pak ditësh. A do të vazhdojmë ta durojmë këtë sistem politik? A bëhemi dot bashkë për ta ndryshuar?”, shkruan Hafizi.
