Deputetja Mimoza Hafizi zgjodhi foltoren e Kuvendit për t’i kthyer përgjigje kryeministrit i cili pak ditë më parë tha se “hante përshesh në partinë e Blushit”.
Hafizi tha se përsheshi i saj është dija, ndërsa i Ramës, kanabisi…
“Unë shkruaj libra për atomet dhe shkencën, libra që iu hapin mendjen. Ju nuk e doni dijen, Shqipëria po rend në rrugën e frikshme të kanabisit. Dija ose përsheshi im dhe kanabisi që ka gjetur shesh për përshesh nën qeverisjen tënde e kanë diçka të përbashkët, ngritjen në qiell. Dija është e sigurt, me të nuk rrëzohesh asnjëherë, kurse kanabisi i trullos, krijon iluzione kalimtare dhe i përplas në një botë të zymtë pa kthim, atë të krimit”,u shpreh ajo.
Duke folur për arsyet që e bënë të ndahej nga PS-ja, Hafizi u rikthye tek ligji i plehrave. “Unë zgjidh ekuacione, ju e përbuzni shkencën. Një qeverisje me dashuri për natyrën nuk do lejonte mbetjet, do kishte prioritet ajrin, ujin e tokën. Prandaj u ndamë secili në rrugën e vetë…”.
