Kryetari i Partisë Demokratike të Kosovës, Kadri Veseli ka ndryshuar qëndrimin e tij në lidhje me tarifën e Kosovës ndaj mallrave serbe.
Ai e ka komentuar vendimin e kryeministrit Kurti për të zëvendësuar tarifën me reciprocitetin si “nguti e tepruar e kryeministrit të ri për të përmbushur kërkesat e Serbisë dhe për të rehatuar Listën Serbe”.
Sipas Veselit, tarifa 100 për qind ndaj importeve të Serbisë dhe Bosnje Hercegovinës nuk duhet hequr, pasi ai vendim ka qenë dinjitoz për Kosovën.
“Qeveria e re duhet të mos të dorëzohet para Serbisë përpara sfidave dhe vendimeve të mëdha që e presin Kosovën”, ka thënë Veseli në një postim në rrjetin social, Facebook.
Ky është një qëndrim i ri i ish-kreut të Parlamentit të Kosovës. Kur partia e tij ishte në pushtet sëbashku me AAK-në e Ramush Haradinajt, Veseli është shprehur se për hir të dialogut tarifa duhet pezulluar pasi kjo nuk ishte një çështje se cili ishte më i fortë.
Tarifa 100 për qind ndaj mallrave nga Serbia dhe Bosnje e Hercegovina u vendos nëntorin e vitit 2018, nga qeveria e kaluar e Kosovës e ish-kryeministrit Ramush Haradinaj.
Thirrje për heqjen e saj patën bërë si Shtetet e Bashkuara, ashtu edhe Bashkimi Evropian, mirëpo Haradinaj nuk ishte zmbrapsur. Më herët gjatë ditës, edhe vetë ai i ka kërkuar kryeministrit të Kosovës, Albin Kurti përmes një letre të hapur që të mos heqë dorë nga kjo masë.
Mesa duket, prej daljes në opozitë këtë qasje ka përqafuar edhe kreu i PDK-së. /Opinion.al
