TIRANË- Guvernatori i Bankës së Shqipërisë Genti Sejko teksa raporton në Komisionin e Ekonomisë shprehet kritik për buxhetin e shtetit për vitin 2016. Ai thotë se legjislacioni tatimor në përgjithësi dhe paketa fiskale e 2016 kërkon ekzaminim më të kujdesshëm.
Sipas guvernatorit, Buxheti 2016 duhet të sjellë reduktim deficiti dhe të borxhit publik. “Borxhi është dobësia më e madhe e ekonomisë shqiptare”, tha ai.
Aspekti i dytë sipas guvernatorit ka të bëjë me projeksioni fiskal “Buxheti 2016 duhet të ndihmojë qëndrueshmërinë e financave publike dhe të ketë projeksione reale mbi deficitin, rritjen, shpenzimet publike etj”, tha më tej guvernatori.
Ndërsa si aspekt të tretë renditi huamarrjen “Rritja e borxhit publike prej 21 mld lekësh e parashikuar në buxhetin 2016 ka ndikim të ulët në tregun e brendshëm financiar. Megjithatë, borxhi është ende i lartë dhe duhen politika për uljen e tij”, tha kreu i Bankës së Shqipërisë.
Ndër të tjera Sejko artikuloi edhe disa sugjerime të bankës së Shqipërisë, ndër të cilat më të rëndësishmet ishte rritja e transparencës fiskale “Në rast se fondi i shpenzimeve nuk përputhet me parashikimet paraprake, rendisni shpenzimet sipas prioritetit. Në rast se të ardhurat rriten, pjesa shtesë e paparashikuar, të shkojnë për uljen e borxhit”, tha Guvernatori Genti Sejko.
