Pep Guardiola nuk do të refuzonte një ftesë të Jose Mourinho-s për të pirë një gotë verë në përfundim të ndeshjes. E shtuna është një ditë e veçantë për botën e futbollit. Të shtunën rihapet një rivalitet i lënë përgjysmë në kohën kur të dy trajnerët ishin në Spanjë. “Do ta pranoj, nëse ai më fton për një gotë verë. Kam shumë respekt për të. Kam mësuar prej tij. Ai ishte trajneri im, asistenti i Sir Bobby Robson. Takimi i fundit në Madrid-Barcelona nuk ishte i lehtë po jemi takuar tre javë më parë dhe folëm pak, bashkë me Ronald Koeman dhe Tony Pulis, dhe çdo gjë shkoi mirë.”
Pep Guardiola nuk është çuditur as nga deklaratat e Zlatan kundrejt tij. “Kam shumë respekt për Zlatan dhe për atë që ka bërë për botën e futbollit. Ai ka pasur një ndikim të madh si brenda, ashtu edhe jashtë fushe. Kam shumë respekt për të, dhe për atë ç’ka bërë për futbollin.” Pep është i vetëdijshëm për forcën fizike të United, si dhe pritet të debutojë portierin e ri Claudio Bravo. “Unë dua të kontrolloj lojën, dhe të pësoj sa më pak kundërsulme. Shpresoj të vazhdojmë siç e kemi nisur. United ka shumë lojtarë të talentuar. Goditjet standarde do të jenë arma e tyre kryesore.”
