Tre italianë, anëtarë të klanit mafioz kalabrez “Ndragheta”, kanë pastruar në Shqipëri rreth 750 mijë euro. Gjykata e Tiranës ka urdhër uarpër bllokimin e pasurive të Andrea Tufariellos dhe Pietro Cosentinos. Paratë në Shqipëri pastroheshin përmes një kompanie Stargold Albania” me ortak Andrea Tufariello dhe Pietro Cosentino me 50% të aksioneve secili dhe administratore shtetasen Brunilda G. Kjo kompani merrej me tregtimin dhe përpunimin e arit dhe nënprodukteve të tij. Kjo shoqëri e ka qendrën në Tiranë, rruga “Dëshmorët e 4 shkurtit” në zonën e Bllokut.
Nga provat e siguruara rezulton se në llogari të subjektit tregtar “Stargold Albania” sh.p.k janë depozituar në vazhdimësi shuma të konsiderueshme monetare, të cilat sipas faturave rezultojnë se kanë lidhje me shitje të floririt nga kjo shoqëri, kryesisht te subjekti
“Esposito Preziosi srl Itali”.
Shumat e depozituara për llogari të shoqërisë “Stargold Albania sh.p.k” pranë një banke të nivelit të dytë nga subjekti “Esposito Preziosi srl Itali” shkojnë në miliona euro.
“Gjatë hetimeve paraprake është administruar informacioni nga misioni Interforcë Itali sipas të cilit ortakët e subjektit “Stargold Albania” sh.p.k janë persona të sinjalizuar për përfshirje në aktivitete kriminale, kryesisht vepra penale të marrjes së pronës në mënyrë të paligjshme”, thuhet në vendimin e gjykatës që botohet nga gazeta “Shqip”.
Mësohet se sipas kontratës për shitjen e kapitalit të datës 20.10.2015 rezulton se ortak i ri i shoqërisë “Stargold Albania” sh.p.k është bërë shtetasi italian, Domenico Papalia, i cili ka blerë rreth 30% të kapitalit.
Sipas informacionit policor rezulton se ky shtetas italian është pjesë e grupit kriminal Ndrageta Itali. “Referuar të dhënave të Drejtorisë Vendore të Policisë gjendja e llogarive të shoqërisë “Stargold Albania” sh.p.k pranë Tirana Bank sh.a është 141 822 euro dhe 53 008 lekë.
Sa më sipër, sipas organit të akuzës, krijohen dyshime se pasuritë e shoqërisë Stargold Albania sh.p.k janë produkt i aktiviteteve kriminale dhe disponimi i lirë i tyre mund të rëndojë pasojat e veprës penale të ‘pastrimit të produkteve të veprës penale ose aktiviteteve kriminale’.
Për këtë arsye kërkohet vendosja e sekuestros preventive mbi llogaritë bankare të shoqërisë “Stargold Albania” sh.p.k pranë një banke të nivelit të dytë me qëllim pengimin e disponimin e lirë të mjeteve monetare, fakt që mund të zgjasë ose rëndonte pasojat e veprës penale të pastrimit të produkteve të veprës penale ose aktiviteteve kriminale që aktualisht është duke u hetuar nga organi i akuzës në kuadër të procedimit penal”, thuhet në vendimin e gjykatës. /Gazeta Shqip
