TIRANE- Një 48-vjeçare është arrestuar pasi për motive xhelozie ka shkatërruar me levë hekuri makinën e bashkëshortit. Ngjarja ka ndodhur në rrugën “Irfan Tomini”, pasditen e së shtunës dhe forcat e Komisariatit nr.2 kanë arrestuar Mimoza D., nënë e tre fëmijëve. Burime nga Policia thanë se fillimisht ngjarja është denoncuar pa autor nga bashkëshorti i 48vjeçares, shtetasi Lekë D. Ai ka parë makinën të thyer në vendin ku e kishte parkuar, para pallatit dhe menjëherë ka njoftuar policinë në lidhje me ngjarjen.
Pa pasur dijeni se ishte gruaja e tij ajo që i kishte thyer xhamat dhe shpuar gomat e mjetit tip “Benz ML”, i dëmtuari i është drejtuar Komisariatit nr.2, ku ka bërë denoncim për shkatërrim prone. Policia ka nisur menjëherë hetimet për ngjarjen dhe kur ka marrë në pyetje familjarët e të dëmtuarit, nëse kishin parë ndonjë person të dyshimtë apo kishin dijeni rreth autorit, Mimoza D. nuk ka pritur të dëgjojë më shumë pyetje, duke thënë se ishte ajo autorja e ngjarjes.
Menjëherë ajo është shoqëruar në Komisariat për të kryer procedurat e tjera dhe më pas i është komunikuar arrestimi me akuzën “shkatërrim prone”. E dyshuara, gjatë deklarimeve të saj para oficerëve të Policisë, ka shpjeguar se makinën e të shoqit e ka dëmtuar për motive xhelozie.
Sipas saj, kishte disa muaj që ajo kishte mosmarrëveshje me të shoqin, për shkak se ai kthehej vonë në shtëpi dhe nuk i jepte shpjegime se ku kishte qenë. Madje, sipas saj, në disa raste, kur ajo e pyeste pse ishte vonuar, ai nevrikosej dhe ngrinte zërin, duke ushtruar dhunë psikologjike ndaj saj.
Këto veprime, sipas të arrestuarës, e kishin bërë atë të dyshojë se i shoqi mund të kishte ndonjë lidhje jashtëmartesore dhe për këtë arsye kishte vendosur të hakmerrej. Ajo ka treguar se edhe të shtunën, pavarësisht se ishte pushim, bashkëshorti i saj ishte kthyer vonë në shtëpi dhe nuk kishte ngrënë drekë me familjen, duke thënë se kishte ngrënë jashtë. Për këtë arsye, ajo ka pritur derisa ai është shtrirë për të fjetur dhe më pas, rreth orës 16:00, ka dalë jashtë dhe me një levë hekuri që ka nxjerrë nga bagazhi i makinës, ka nisur të thyejë xhamat e mjetit të të shoqit e në fund e ka mbyllur duke i shpuar gomat. /Panorama/
