Bashkëshortja e Donald Trump ka thënë se kandidati i mundshëm republikan për president do të jetë një lider gjithpërfshirës nëse zgjidhet, duke iu shërbyer të gjithë amerikanëve pavarësisht racës, fesë apo të ardhura.
Duke folur gjatë konventës kombëtare të Partisë Republikane në Cleveland më 18 korrik, portretizimi që Melania Trump i ka bërë bashkëshortit të saj ka pasur për qëllim që të zbusë të gjitha kritikat e ashpra, me të cilat është përballur ai pas deklarimeve për myslimanët dhe imigrantët.
“Donald ka për qëllim që të përfaqësojë të gjithë njerëzit, jo vetëm disa prej tyre”, ka thënë ajo pasi është prezantuar nga bashkëshorti i saj, i cili është paraqitur në skenë nën tingujt e këngës së grupit britanik, “Queen” – “We Are The Champions”.
Ish modelja dhe imigrantja sllovene, Melania Trump e ka pranuar “entuziazmin dhe dramën” e fushatës së Trump, por ka thënë se “mbi të gjitha burri im do të mbetet i përqëndruar në një gjë: këtë vend të bukur që ai e do shumë”.
Trump, i cili pritet që gjatë kësaj jave të sigurojë nominimin zyrtar të partisë, sipas të gjitha gjasave do të përballet me kandidaten e mundshme demokrate dhe ish Sekretaren e Shtetit, Hillary Clinton në zgjedhjet presidenciale të 8 nëntorit.
Duke iu drejtuar masës në arenën e qytetit, Cleveland, Trump ka thënë: “Ne do të fitojmë aq shumë. Ju falemnderit zonja dhe zotërinjë. Ne do të fitojmë aq shumë”.
