Gjykata e Vlorës ka liruar 21-vjeçarin Petraq Beja, duke e lënë në arrest shtëpie nga masa arrest me burg që kërkoi prokuroria. Ai drejtonte automjetin BMW X6, ku humbi jetën kushëriri i tij Kristi Panajoti, 18 vjeç.
Prokuroria kërkoi arrest me burg për shoferin Beja si dhe për dy inxhinierët e firmës që po kryente punime në rrugë, por gjykata ka hedhur poshtë kërkesën për 21-vjeçarin duke e lënë në arrest shtëpie me mbikëqyrje elektronike.
Aktualisht Beja ndodhet në spital ku do i komunikohet edhe masa e sigurisë. Ai ka pësuar disa dëmtime trupore nga aksidenti si thyrje të hundës, parakrahut dhe pjesës së kockës së legenit.
Po për këtë ngjarje u arrestua një shef policie, pasi kishte tentuar të manipulonte ngjarjen. Myslym Ismailaj, shef i hetimit të aksidenteve rrugore i ka kërkuar Petraq Bejës të dëshmonte se nuk sheh mirë nga sytë, duke dashur të shmangë përgjegjësinë e firmës së ndërtimit që nuk kishte vendosur sinjalistikën e duhur.
Familjarët e viktimës, Kristi Panajoti si dhe drejtuesi i mjeti kanë ngritur që në fillim pretendimet se në aksion Skelë-Uji i Ftohtë që është në rikonstruksion ishte hapur një gropë e madhe dhe në rrugë nuk kishte asnjë shenjë sinjalizuese dhe as ndriçim.
