Policia e shtetit ka njoftuar qytetarët se ditën e nesërme do të pezullohet qarkullimi i automjeteve në pikat kufitare me Greqinë, si pasojë e grevës së planifikuar nga doganierët e palës greke.
Përmes një reagimi zyrtar, policia bën me dije se do të pezullohet lëvizja e lirë e automjeteve nga ora 07:00 deri në orën 23:00, në PKK Kakavijë, PKK Qafë Bot – Sarandë dhe PKK Tre Urat – Përmet.
Gjithashtu, theksohet se gjatë kësaj periudhe do të lejohen vetëm këmbësorët pa bagazhe dhe ambulancat.
Njoftimi i policisë:
Departamenti i Policisë Kufitare dhe Migracionit në Policinë e Shtetit është njoftuar nga Qendra e Bashkëpunimit Policor në Kakavijë se më datë 28.02.2025, nga ora 07:00 deri në orën 23:00, punonjësit e doganës greke në PKK Kakavijë, PKK Qafë Bot – Sarandë dhe PKK Tre Urat – Përmet do të zhvillojnë grevë, dhe për këtë arsye do të pezullohet lëvizja e lirë e automjeteve.
Policia Kufitare e Janinës ka sqaruar se gjatë kësaj periudhe do të lejohen vetëm këmbësorët pa bagazhe dhe rastet emergjente shëndetësore (ambulancat).
Nisur nga kjo situatë, Policia Kufitare apelon për të gjithë qytetarët dhe drejtuesit e automjeteve që kanë planifikuar lëvizjen drejt Greqisë, të gjejnë alternativa të tjera për të udhëtuar dhe të shmangin grumbullimin në pikat kufitare të sipërpërmendura deri në një njoftim të dytë.
