Greva e arsimtarëve në Kosovë do të vazhdojë. Me këtë vendim ka dalë sindikata pasditen e sotme edhe pse Kryeministri Haradinaj propozoi rritjen e pagave.
Sindikata e Bashkuar e Arsimit, Shkencës dhe Kulturës (SBASHK) nëpërmjet një komunikate për media deklaroi se oferta e kryeministrit Ramush Haradinaj “nuk i plotëson kërkesat”.
Kryeministri Haradinaj gjatë një takimi që ka zhvilluar me anëtarë të sindikatës ka thënë se rritja do të bëhet nga 534 euro në 597 për mësimdhënësit në shkolla të mesme, nga 479 në 525 për ata në arsimin fillor dhe nga 447 në 501 te ata në nivelin parashkollor.
Ndërsa sindikata deklaron se “Kryetari Jasharaj u takua me Kryeministrin Haradinaj dhe ministrin Bytyqi ku mori një ofertë në formë të shkruar nga kryeministri Haradinaj në të cilën ofertë kishte ngritje të koeficientit prej 0.2 vetëm për mësimdhënësit e arsimit parauniversitar (nga çerdhet e deri tek shkollat e mesme), që është rreth 10 % e ngritjes së koeficiontit. Kjo ofertë nuk i plotëson kërkesat e SBASHK-ut, aq më shumë pasi qe nuk janë përfshirë punëtorët teknik , punëtorët administrativ si dhe i tërë sistemi universitar. Ju njoftojmë se greva vazhdon edhe ditët ne vijmë më shpresën se dialogu do të vazhdojë deri në plotësimin e kërkesave të anëtarësisë”.
Greva e mësuesve në Kosovë po zhvillohet prej 1 jave duke paralizuar mësimdhënien në gjithë vendin. Prindërit ankohen se fëmijët kanë mbetur pa mësim dhe kërkojnë që të gjendet zgjidhja sa më parë.
*Statusi i Kryeministrit Haradinaj
