Greqia dhe Shqipëria kanë nënshkruar të premten marrëveshjen për njohjen e ndërsjelltë të lejeve të drejtimit.
Që pas hyrjes në fuqi të marrëveshjes, emigrantët shqiptarë në Greqi nuk do ta kenë më të nevojshme të bëjnë kurs dhe provim patente në shtetin fqinj, por do të mjaftojë dorëzimi i lejes së drejtimit që ata kanë nga Shqipëria për të marrë ekuivalenten greke.
Kjo lëvizje do t’u kursejë shumë kohë dhe para të gjithë emigrantëve shqiptarë duke u dhënë të drejta të barabarta punësimi të gjithë atyre që kanë patenta shqiptare.
Marrëveshja e rëndësishme është nënshkruar të premten nga ministri i Shqipërisë për Europën dhe Punët e Jashtme, Ditmir Bushati dhe homologu i tij grek, Nikos Kotzias.
