Media greke “Kathimerini” në një artikull të publikuar zbulon se qeverisë së Athinës po i kërkohet nga disa prej kancelarive më të rëndësishme europiane të mos bllokojë rrugën e Shqipërisë drejt BE.
Artikulli titullohet “Greqia nën presionin e BE-së për të mos bllokuar integrimin e Shqipërisë.” Sipas “Kathimerinit”, diskutimi pritet të zhvillohet në takimin e përfaqësuesve të përhershëm në BE (Coreper) të mërkurën, pasi Shqipëria përfundoi me sukses fazën e parë të negociatave të anëtarësimit në BE (procesi i screening) të premten e kaluar pas 14 muajsh konsultime.
“Nuk është sekret se Athinës i është bërë presion për të hyrë në linjë, dhe në komentet për “Kathimerini”, burime diplomatike evropiane thanë se kancelari gjerman, Olaf Scholz ka deklaruar përmes kanaleve diplomatike se procesi i anëtarësimit nuk duhet të jetë një çështje dypalëshe. Madje, sipas një zyrtari evropian, edhe Presidenca Spanjolle e BE-së shfaqet veçanërisht e acaruar me qëndrimin e palës greke”.
Deri më tani Greqia ka refuzuar të nënshkruajë një letër të 27 vendeve anëtare drejtuar Komisionit Europian, që kërkon hapjen e kapitujve të parë në këtë proces pas përfundimit me sukses të fazës së parë të negociatave të njohur ndryshe si screening.
Në këtë sfond, Greqia nuk mundet, thanë burime diplomatike, të vazhdojë të mbajë të bllokuar letrën në fjalë për një kohë të gjatë. Megjithatë sipas të njëjtave burime, edhe në rast se Greqia vendos të dërgojë letrën e lartpërmendur nga Këshilli Evropian, Athina po shqyrton mundësinë për të bllokuar fazën e radhës, raportin e përhershëm të anëtarësimit apo dhe thirrjen e një konference ndërqeveritare.
Greqia vijon të mbajë këtë qëndrim ndaj Shqipërisë për shkak të çështjes “Beleri”. Por pak ditë më parë, kancelari gjerman Olaf Sholz e tha në krah të kryeministrit grek, Mitcotakis se Berlini nuk e sheh me sy të mirë bllokimin e integrimit për shkak të çështjeve dypalëshe.
