Më shumë se dy kilogramë heroinë është sekuestruar sot në Heraklion të Greqisë, sasi droge e cila i është gjetur një gruaje nga Ukraina që sapo kishte zbritur nga trageti. Pas mbërritjes së tragetit nga Pireu në Heraklion, efektivët kanë kontrolluar gruan, për të cilën kishin marrë informacion më herët, se kishte ngarkesë të dyshimtë me vete. 65 vjecares gjatë kontrollit iu gjetën katër pako me heroinë, me një peshë totale 2,138 gram.
Sipas informacioneve nga policia greke, mediat shkruajnë se gruaja dyshohet të jetë e përfshirë në rrjetin e trafikimit të drogës, truri i të cilit dyshohet se janë shqiptarë. Mediat greke citojnë burimet zyrtare duke publikuar edhe dëshminë e gruas gjatë arrestimit. Ajo ka thënë se pakot me drogë do ia dorëzonte një personi me origjinë shqiptare. Pas shkëmbimit, ajo tha se do merrte nga shqiptari 1.000 euro. Droga ishte fshehur në bagazhet e gruas nga Ukraina, ndërsa nga një llogaritje paraprake, thuhet se nëse heroina shitej në treg, trafikantëve do u siguronte 40.000-50.000 euro.
