Greqia ka shënuar këtë të dielë, shifra të larta të të infektuarve me COVID-19. Gjatë 24 orëve të fundit në vendin fqinj janë konfirmuar 1678 raste të reja dhe kanë humbur jetën 9 persona.
Mediat vendase bëjnë me dije se qyteti me numrin më të lartë të rasteve të reja është Selaniku me 449 raste të reja, ndjekur nga Athina me 300 raste pozitive.
Prej fillimit të pandemisë e deri më tani numri i të infektuarve me Covid në Greqi ka shkuar në 40929 persona mes të cilëve 635 kanë humbur jetën.
Përkeqësimi i situatës së pandemisë, ka bërë që, qeveria e Athinës të shtrëngojë masat për të parandaluar përhapjen e infeksionit.
Masat parashikojnë ndalimin e aktiviteteve sportive në Atikë, mbylljen e restoranteve, mbajtjen e maskës me detyrim në ambiente të hapura dhe të mbyllura.
Kufizimi i trafikut nga mesnata deri në orën 05:00 të mëngjesit do të shtrihet në të gjithë vendin, përjashtohen vetëm lëvizjet për punë dhe arsye shëndetësore. Në strukturat sociale do të pezullohen vizitat, ndërkohë që dyqanet, parukeritë, hotelet dhe shkollat do të vijojnë të qëndrojnë të hapura. Ndeshjet sportive dhe stërvitjet do të zhvillohen pa tifozë ndërkohë që stafi do të punojë me një kapacitet prej 75%./ Opinion.al
