Policia greke vuri në pranga 14 persona, mes tyre edhe 11 shtetas shqiptarë për trafik droge. Droga e llojit kokainë, heroinë dhe hashash i përpunuar kishte për qëllim tregun vendas.
Sipas mediave greke operacioni i policisë u finalizua mbrëmjen e së enjtes në zonën e Atikës, ku u zbulua edhe një laborator i përpunimit të drogës, raporton express.
Ende nuk bëhen të ditur emrat e personave të arrestuar.
Në cilësinë e provës materiale policia sekuestroi 7 kilogramë heroinë, 850 gram kanabis i përpunuar, 37.6 gram kokainë dhe 5 kilogramë e 506 gram pluhur farmaceutik i përshtatshëm për tjetërsimin e drogës.
U sekuestruan edhe pajisje laboratorike për përpunimin e drogës, një pistoletë, një sasi parash prej 13 635 euro si dhe 2500 lekë shqiptare, dy makina, telefon celularë.
