Pavarësisht se Shqipëria ka kodin e punës nga më të avancuarit për të drejtat e punonjësve në Europë, realitetet që ofrohen janë të zymta. Kushtet e punës gjithnjë e më shumë nuk po i favorizojnë gratë ti përkushtohen mëmësisë.
Instituti i Statistikës vuri në dukje në një raport të fundit se përqindja e aborteve të kryera nga gratë e punësuara ka pësuar një rritje te dukshme krahasuar me vitin 2015, nga 15,9 % në 21.7 %. Ndërkohë përqindja e aborteve nga gratë e papuna ka pësuar një rënie.
Në 2015, 83,7 % e aborteve kryheshin nga gra të papuna, ndërkohë në 2016 abortet e kryera nga kjo kategori janë 76,7 %.
Krahasimi ndër vite i aborteve sipas statusit martesor të gruas, tregon që mbi 90 % e aborteve kryhen nga gratë e martuara gjatë gjithë periudhës 2009-2016.
INSTAT thotë se abortet sipas grupmoshës kryhen kryesisht në grup moshën 20-34 vjeç, ku është dhe mosha më riprodhuese e gruas. Në këtë grupmoshë ndodhin 67,7 % e aborteve. Për sa i përket grupmoshës mbi 34 vjeç, kryhen rreth 26,3 % te aborteve.
Në gratë e moshës 20-34 vjeç, 8,59 % kryejnë një lindje dhe 1,17 % kryejnë një abort, ndërkohë për grupmoshën mbi 34 vjeç 1,07 % e grave bëjnë një lindje dhe 0,53 % kryejnë një abort.
Për sa i përket aborteve në adoleshencë analiza është bërë në mosha teke, 15-19 vjeç, ku në moshën 17 vjeç kemi vlerën më të lartë të këtij treguesi me 146 aborte për 1000 lindje.
Rreth 40 % e aborteve kryhen nga gratë me nivel arsimor të ulët atë 9-vjeçar dhe tendenca e numrit të aborteve në këtë kategori ka qenë në rritje për periudhën 2009-2016.
Grupi i grave me nivel arsimor të mesëm zë vendin e dytë ku 34 % e aborteve janë kryer nga ky grup në vitin 2016. Ndërkohë dhe gratë me nivel arsimor të lartë kryejnë rreth 18,5 % të aborteve për vitin 2016 dhe ato kanë një tendencë në rritje gjatë kësaj periudhe./Monitor
