Ministri i Brendshëm, Taulant Balla ka folur për mediat lidhur me dy grabitjet e fundit, të argjendarisë në Kamëz dhe të tentativës për grabitje të një banesë në fshatin Prush.
Sipas ministrit Balla, policia ka shtuar vigjilencën pas gjatë festave është vënë re një rritje e shkallës së krimit në fushën e vjedhjes dhe grabitjes.
Për të dyja rastet, Balla tha se janë në rrugën e duhur për të vënë para drejtësisë autorët e këtyre ngjarjeve.
“Mendoj që në rastin e Prushit policia ka mbërritur në kohë rekord, duke parandaluar dhe e dyta që unë e kam thënë lidhet me kohën e festave. Gjatë kësaj kohe ka një rritje të veprimtarisë kriminale në fushën e grabitjeve dhe vjedhjeve.
I kam kërkuar policisë së shtetit që të bëjë dhe të rrisë shkallën e vigjilencës në mënyrë që të parandalohet çdo ngjarje kriminale.
Shpresoj që personat e përfshirë në tentativën e grabitjes në Prush, apo në Kamëz të vihen para drejtësisë dhe jemi në rrugën e duhur”, tha Balla.
