Lidhur me dy të rinjtë të cilët vidhnin mjetet me pult, policia tashmë po kryen hetime edhe për 22 raste. Dy nga këto raste janë të dokumentuara me pamje filmike. Deivis Muka dhe Matilda Mertini po hetohen nga policia dhe për të paktën 22 vjedhje të tjera, të kryera nga janari deri në gusht të vitit 2015 në Tiranë, Kamzë, Durrës dhe Vlorë.
Në grupin hetimor ka të dhëna se ka disa ngjarje që rezultojnë të jenë kryer në periudhën e verës, gjatë sezonit të plazhit si dhe në qendra të tjera tregtare.
Policia ka përftuar informacion të vlefshëm për vjedhjet pa thyerje të sendeve personale brenda mjeteve.
Dosjet e pezulluara për këto raste pritet ti kalojnë Drejtorisë së Policisë, Tiranë. Matilda Mertini dhe Deivis Muka, të ndihmuar dhe nga një person i tretë, ne datën 13 mars arritën të vidhnin pa thyerje, me një pult bllokues valësh, të paktën dy makina në harkun kohor të 12 minutave dhe më pas janë larguar.
Policia ka shpallur në kërkim bashkëpunëtorin e tretë, që dyshohet të jetë një 18 vjeçar nga Bërxulli.
