30 mijë euro është shpërblimi që policia e Durrësit ka vendosur për cilindo që jep informacione nmbi autorët e mundshëm të grabitjes së Rinasit. Edhe pse ende nuk artikulohne emra konkretë, mendohet se grabitësit janë banorë të Tiranës dhe se kjo nuk është “vepra” e tyre e parë.
Arjan Hoxha, ekspert në fushën e grabitjeve, në një intervistë për gazetën ‘Shekulli’ thotë se grabitësit e Rinasit janë po të njëjtët, që kanë kryer grabitje të ngjashme të parave gjatë transportimit të tyre nga firmat private të sigurisë. Sipas tij, grabitje të tilla nuk ka shanse që të ndodhin nëse autorët nuk kanë njerëz të brendshëm apo të jenë të informuar për lëvizje të tilla të parave.
“Nuk mund të ndodhë në asnjë rast nëse nuk rrjedh informacion. Është mundësia zero për t’u kryer këto grabitje. Mundësia është zero, pasi ata njerëz (grabitësit) nuk është se kanë ngritur një pikë vrojtimi në një vend të caktuar dhe qëndrojnë në ruajtje gjatë gjithë kohës kur të vijë një makinë që transporton vlera monetare apo çfarëdo tjetër dhe të ndërhynin për të bërë goditjen. Ata kanë qenë të mirëinformuar dhe në moment sapo ka mbërritur në destinacion automjeti me paratë, grabitësit kanë hyrë në ambientet e aeroportit dhe me qetësinë më të madhe kanë kryer grabitjen dhe kanë shikuar punën e tyre”, shprehet Hoxha duke shtuar se këta grabitës shumë shpejt do të kryejnë vjedhjen e radhës.
“Këta persona tashmë kanë fituar sigurinë që mund të kryejnë, po ashtu kanë fituar edhe mbështetje të fortë dhe po veprojnë herë pas herë, madje mund të them se shumë ata do të veprojnë përsëri”, pohon eksperti.
