Drejtori i Policisë Kufitare ka folur për herë të parë për grabitjen spektkakolare të së enjtes së kaluar, ku u vodhën brenda pistës së Aeroportit të Rinasit 1 mln euro të një banke të nivelit të dytë.
Genc Merepeza, ishte i ftuar në emisionin “45 Minuta” të “Report TV”. Ai ka sqaruar rrethanat e paqarta të grabitjes. Sipas tij, Policia u njoftua në orën 14:32 minuta, pra 3 minuta pasi mjeti i grabitësve doli nga aeroporti.
Lidhur me akuzat e TIA-s, se policia ishte prezente në pistë dhe nuk veproi, Merepeza tha se në pistë gjendeshin vetëm dy policë, që do të shoqëronin dy të dëbuar nga Vjena. Ai tha se policët ishin larg dhe nuk kishin fushëpamje.
“Në momentin që kryej grabitja në aeroport po ulej një avion nga Vjena ku gjendeshin dy të dëbuar shqiptarë. Prandaj dy policët ishin aty për të shoqëruar dy të dëbuarit. Por ata ishin larg dhe s’kishin fushëpamje”, tha Merepeza. “Ne jemi njoftuar me vonesë. Telefonata për grabitjen është bërë 3 minuta pasi makina kishte dalë nga aeroporti dhe ne e gjetëm shumë pranë dhe të djegur. Pra autorët kanë dalë dhe kanë patur kohë edhe të djegin mjetin”, tregon ai.
