Ditën e nesërme Gjykata e Shkallës së Parë Krujë, do të vendosë masën e arrestit për 5 të ndaluarit për grabitjen e rreth 1 milion eurove në Aeroportin e Rinasit.
Arben Karafili, Shef i stacionit të Kompanisë ICTS, përgjegjëse për sigurinë në pistë, sipas akuzës, nuk ka marrë masat për parandalimin e ngjarjeve të tilla edhe pse ka qenë i informuar për rrezikun që paraqitej në portën ku hynë grabitësit.
Bledar Blloshmi dhe Fadil Jonuzaj agjentë të sigurisë, punonjës të ICTS kanë patur si detyrë të patrullojnë perimetrin ku ndodhi grabitja.
Vangjel Nikolla, Drejtor i Shërbimeve Aeroportuale në Rinas nuk ka bërë kontrollin e elementëve të sigurisë që ka marrë përsipër sipas kontratës, të nënshkruar me firmën nënkontraktore “ICST Albania”.
Të pesë këta persona do të njihen zyrtarisht me akuzën e “shpërdorimit të detyrës” si edhe do t’u caktohet masa e sigurisë nga trupa gjykuese.
Prokuroria do të kërkojë masën e arrestit me burg për të pestë të ndaluarit, ndërsa një ditë më parë, organi hetues zbardhi dhe shkeljet që pesë të ndaluarit kanë kryer gjatë ushtrimit të detyrës së tyre.
