Partia Demokratike dhe Lëvizja Socialiste për Integrimin kërkojnë njëzëri që Presidenti Bujari Nishani të mbledhë Këshillin e Sigurisë duke e cilësuar grabitjen në Rinas si një ngjarje të paprecendet që ka rrezikuar rëndë Sigurinë Kombëtare.
Për Partinë Demokratike, foli Edi Paloka. Nënkryetari Paloka i bëri thirrje Prokurorit të Përgjithshëm të kryejë një hetim të plotë, ndërsa ftoi kreun e shtetit të mbledhë Këshillin e Sigurisë Kombëtare.
“E gjitha kjo, në kohën kur alarmi për terrorizmin është në klumin e vet, ndërkohë që gjithë shtetet kanë marrë masa mbrojtëse, e në kontrast të plotë, në vendin tonë ka rënë çdo standard i sigurisë. Partia Demokratike i kërkon Presidentit të Republikës të mbledhë Këshillin e Sigurisë Kombëtare, e të bëhet çdo analizë e të dalë çdo përgjegjësi për këtë krim të rëndë, që e ka nxjerrë vendin tonë të rrezikuar e të pasigurtë, pikërisht në kohën e kërcënimeve të mëdha të terrorizmit.”
Për Lëvizjen Socialiste për Integrim, reagoi Sekretari i Përgjithshëm dhe anëtar i Komisioni të Sigurisë, Luan Rama. Ai e ka cilësuar tejet e rëndë ngjarjen, duke i kërkuar kreut të shtetit të mbledhë Këshilin e Sigurisë Kombëtare. Ai shkruan se vjedhja në pistën e aeroportit është papërgjegjshmëri për sigurinë kombëtare, në një kohë kur sipas tij, kjo ngjarje vjen pas masave shtesë të sigurisë nga ana e policisë.
Deputeti Rama fton kreun e qeverisë të marrë masa për institucionet përgjegjëse, ndërsa kërkon një hetim të plotë të ngjarjes me angazhimin e Ministrisë së Brendshme, prokurorë dhe Shërbimit Informativ Shtetëror.
