Prokuroria e Krimeve të Rënda dorëzoi në gjykatë, kërkesën për caktimin e masës së sigurisë “Arrest me burg” për Aldi Lleshaj, të riun që tentoi të vrasë efektivin e policisë pak ditë më parë në afërsi të Laçit.
Mësohet se kërkesa është dorëzuar nga prokurori Behar Dibra, i cili ka kryer të gjitha veprimet e para hetimore, duke akuzuar të riun për veprën penale të “Vrasjes në rrethanë rënduese ndaj efektivit të policisë” të mbetur në tentativë. Nëse deklarohet fajtor për këtë vepër penale, ai rrezikon një dënim deri në 35 vite burg. Pritet që seanca për vleftësimin e arrestit të zhvillohet gjatë mesditës së dielës, nga Gjykata e Krimeve të Rënda në Tiranë.
Nga ana tjetër, burimet thanë se gjatë marrjes në pyetje, Aldi Lleshaj ka shprehur pendesë për sulmin me armë ndaj policisë, duke pretenduar se ka qenë i trembur dhe nuk kishte si qëllim të vriste efektivët e policisë. Ai ka pretenduar se kishte qëlluar me armë, që policia të mos e ndiqte nga pas. Sipas Prokurorisë, i riu njihet edhe si përdorues i lëndëve narkotike dhe për këtë fakt, është kërkuar kryerja e analizave të gjakut për të parë, nëse në momentin e grabitjes dhe sulmit me armë ka qenë nën efektin e drogës. Veç kësaj, prokuroria mësohet se ka sekuestruar edhe dosjen penale të tij, ku në Tetor të këtij viti pas një sherri banal gjatë lojës me domino, ka qëlluar dhe kanosur shokun e tij, veprim për të cilën është arrestuar. Një muaj më pas, me kërkesë të Prokurorisë, Gjykata e Kurbinit ka urdhëruar lirimin e tij, me masën e sigurisë “Detyrim për paraqitjeje”.
Aldi Lleshaj, sipas akuzës, mëngjesin e datës 22 Dhjetor në qendër të Laçit, nën kërcënimin e armës ka zbritur nga makina e llojit Porsche pronarin e saj, duke ia grabitur mjetin. Pas kësaj grabitje, pronari i makinës ka njoftuar policinë e cila ka vendosur postbllok në dalje të qytetit në disa rrugë dytësore. Në afërsi të Fush-Gjormit është shfaqur i riu me makinë, ku edhe patrulla i është vënë në ndjekje. Në këtë moment, ai ka shkrepur armën e llojit pistoletë në drejtim të makinës së policisë, duke plagosur në kokë efektivin Nikolin Gjergji. Por 30 minuta më pas, ai është rrethuar dhe me ndihmën e forcave të RENEA-së është arrestuar, duke e plagosur në këmbë.
