Kreu i PD-së, Lulzim Basha ka reaguar në lidhje me grabitjen e ndodhur mesditën e sotme në Rinas, ku persona të armatosur kanë marrë një shumë të madhe parash.
Ja çfarë shkruan Lulzim Basha në Facebook:
Grabitja e armatosur sot në Rinas, në atë që duhej të ishte territori më i sigurtë në vend, dëshmon se rendi ka rënë, se shteti ka rënë. Persona me armatim të rëndë e me maska, shkojnë deri tek pista e avionëve, grabisin paratë, vetëm një ditë pasi u deklarua se në aeroportin e Rinasit janë përforcuar kontrollet në kuadër të masave kundër terrorizmit, pas sulmeve ne Stamboll.
Ku janë cubat e Tahirit, apo me siguri duke ruajtur parcelat me kanabis te Habilajve për llogari të shefit, duke kundruar udhëtimin e skafeve me drogë që kanë pushtuar Jonin dhe Adriatikun, duke përgjuar në mënyrë të paligjshme e shantazhuar gjyqtarë e prokurorë, duke dhunuar e gjobitur qytetare e biznesmenë apo duke arrestuar gra dhe pleq për kuponin e një kg qepe apo 2000 lekë drita të papaguara.
Kjo ngjarje e rëndë, që ka shkallmuar çdo standard të sigurisë, është një akuzë direkte për Saimir Tahirin dhe Edi Ramën. Në pushtetin e tyre krimi s’ka kufij, ka mbrojtje, ka liri. #ShqipëriamëmirëpaEdi Ramën.
