Janë zbardhur detaje të reja nga grabitja e ndodhur dy orë më parë në fshatin Fitore të Vlorës, ky tre persona të maskuar kanë grabitur një supermarket duke kërcënuar me armë pronarët e biznesit.
Sipas korespondentit të News 24 në Vlorë, Enrik Mehmetaj, pronari i supermarketit nuk ka bërë rezistencë, madje u është lutur grabitëve që të marrin çfarë të duan vetëm të mos qëllojnë atë dhe familjen e tij.
Pasi grabitësit kanë marrë xhiron ditore prej 50 mijë lekësh të reja dhe steka me paketa ata janë larguar duke qëlluar me qytën e armës pronarin e supermarketit. Po sipas dëshmive të banorëve të fshatit Fitore kjo është grabitja e dytë brenda një kohe të shkurtër, ku në një fshat tjetër, po tre persona të maskuar kanë grabitur një market.
