Shlyerja e borxheve që grabitësit kishin te disa persona duket se është motivi i grabitjes së bankës në zonën e ish Bllokut në 8 Gusht, tre autorët e së cilës u arrestuan gjatë ditës së djeshme.
Roland Liti (Zekaj) dhe Alan Babameto janë të skeduar si persona që frekuentojnë lojërat e fatit.
Mësohet se një pjesë të parave të grabitura në bankë ia kanë dhënë Robert Kullës, i cili sipas informacioneve nga Policia, jepte para me fajde.
Një tjetër detaj i ri i kësaj ngjarje është fakti që një ditë pas grabitjes, Roland Liti dhe Alan Babameto janë nisur drejt Malit të Zi, ku siç mësohet kanë shlyer një borxh që kanë pasur atje.
Sipas Policisë ditën e grabitjes në bankë është futur Alan Babameto, duke përfituar edhe nga fakti se është i dobët.
Në 8 Gusht autorët krijuan një carje ne mur per te hyre ne banke e saktësisht në dhomën e kasafortës.
Ngjarja u zbulua kur banka e nivelit të dytë konstatoi boshatisjen e kasafortës ku janë marrë një shumë totale prej rreth 200 mijë dollarësh.
Skenari spektakolar është realizuar me anë të hapjes së vrimave me dimensione 50×30 në dy faqe muri, që lidhnin bankën me një bodrum që rrinte prej vitesh i boshatisur.
Duke shfrytëzuar njohjen në detaje të planimetrisë së ndërtesës dhe, me sa duket, duke pasur të dhëna nga brenda bankës për pozicionin e kasafortës, autorët kanë vepruar me saktësi.
Ata kanë shfrytëzuar një bodrum, ishlokal nate dhe më vonë ishkazino, ku kanë hyrë dhe kanë punuar të pashqetësuar nga njeri, të paktën 23 ditë.
