Në Komisionin e Sigurisë diskutohet sot mbi incidentin e rëndë, grabitjen në aeroportin ndërkombëtar të Rinasit. Deputeti i LSI, Luan Rama tha se pas kësaj ngjarje siguria në Rinas është zero, pasi ngjarje të tilla sipas tij nuk kanë ndodhur as në vitin 1997.
“Siguria në Rinas është zero, ngjarje të tilla nuk kanë ndodhur as në vitin 1997. Nuk ka rëndësi shumë e vjedhur, por fakti që në Rinas hyri grupi i armatosur. Është shkelur siguria kombëtare dhe vija e kufirit. Duhet të kërkojmë llogari për masat e marra pas ngjarjeve në Stamboll”, tha ai, duke bërë thirrje që Presidenti i Republikës të reagojë.
Ndërsa deputeti socialist Paulin Sterkaj u shpreh se duhet lënë ë hetimet për të zbardhur ngjarjen. “Duhet të lëmë hetimet të flasin vetë. Kam bindjen se grupi që grabiti s’ka qenë grup i armatosur, por marrëveshje midis individëve me pozicione te ndryshme”, tha ai.
Deputeti Asllan Dogjani, tha se është cenuar rëndë siguria kombëtare, dhe se duhet te ishte ne raportim ministri i Brendshëm.
“Makina e cila u përdor nga grabitësit mund të ishte me eksploziv, duhet të merreshin masa për një mbledhje te jashtëzakonshme për sigurinë kombëtare”, tha ai.
