Ministri i Ekonomisë, Kulturës dhe Inovacionit, Blendi Gonxhja ka deklaruar se duhet të shkohet me shpejtësi drejt formalizimit të plotë të tregut.
Ai theksoi se është një borxh 100 milionë euro, ku ka subjekte publike e private, që duhet ta paguajnë pasi ndikon në skemën e pensioneve.
Në një bashkëbisedim me bizneset, Gonxhe tha se pagesat në dorë janë një problem serioz, pasi janë para që nuk futen në sistem, në mënyrë që të përkthehen më pas në shërbime për qytetarët e në veçanti për pensionistët.
“Tregu duhet të jetë gjithmonë e më i formalizuar, që të ketë konkurrencë të drejtë. Informaliteti është ende një plagë e pashëruar në shoqërinë tonë dhe lidhet me mendësinë e shoqërisë. Kemi një borxh 100 milionë euro, ku ka subjekte publike e private, që duhet të paguajnë këtë borxh, që ndikon në skemën e pensioneve. Problematike është edhe pagesa me para në dorë, efektet ndihen direkt në ekonomi. Po ndërtojmë një plan pune, që të kemi ndërhyrje strategjike. Është një bashkëpunim mes punonjësit dhe punëdhënësit, që dëmton skemën totale të ekonomisë sonë. Ka shumë rëndësi që ne të kuptojmë se çfarë rëndësie kanë këto veprime, ne duhet të kemi një angazhim më të madh për një ndërgjegjësim më të madh për këto fenomene”, tha Gonxhja.
