E njohur si “Mbretëresha e Bletëve”, një e moshuar nga Londra është dënuar me 20 vite burg pasi drejtoi një rrjet familjar që shpërndante kokainë me vlerë mbi 80 milionë paund në Mbretërinë e Bashkuar.
Shtetasja Deborah Mason, 65 vjeç, udhëhiqte trafikun nga shtëpia e saj në Tufnell Park, në veri të Londrës. Ajo përfshinte në aktivitet pothuajse të gjithë familjen e saj të afërt, madje duke bërë edhe “ekskursione” familjare me nipërit për të dorëzuar drogën.
Siç raportojnë mediat e huaja duke iu referuar prokurorisë, Mason kishte ndërtuar një strukturë të sofistikuar me ndihmën e motrës së saj, tre vajzave, djalit, partnerëve të tyre dhe një shoqeje të familjes. Anëtarët e këtij rrjeti fitonin mbi 1,000 paund në ditë, ndërsa importuan rreth një ton kokainë gjatë vitit të kaluar.
65 vjeçarja Deborah Mason u arrestua në maj të vitit të kaluar, ndërsa pamjet e policisë treguan momentin kur ajo u konfrontua nga oficerët në shtëpi. Në video, ajo dëgjohet duke thënë: “Çfarë po ndodh, ju lutem?”, përpara se të shpërthente: “Mua po më arrestoni? Mua? Hajde mos bëni shaka.”
“Gjyshe gangstere” e e vetëquajtur kështu përdorte fitimin e saj jo vetëm për udhëtime luksoze në Dubai, Bahrein dhe Turqi, por edhe për blerje të çuditshme – siç u zbulua në gjyq, ajo kishte blerë një jakë dhe zinxhir Gucci për macen e saj.
Siç raportojnë mediat, Policia e Londrës tha se rrjeti i drejtuar nga Mason shpërndante kokainë në qytete si Bradford, Leicester, Birmingham, Bristol dhe Cardiff, nga prilli deri në nëntor 2023.
Gjashtë anëtarë të familjes u dënuan me më shumë se 85 vite burg, ndërsa njëra nga të akuzuarat, Chloe Hodgkin, e cila është shtatzënë, do të dënohet në një datë të mëvonshme.
