Një ngjarje e rëndë u shënua sot në Golem. Një fëmijë i mitur, vetëm 3 vjeç është mbytur në pishinën e një hoteli. Mësohet se gjyshja e kishte marrë me vete në punë fëmijën, pasi ishte e punësuar si sanitare.
I mituri është parë në ujë nga një tjetër pjesëtar i stafit të hotelit që e ka nxjerrë nga pishina, po megjithë ndihmën e dhënë fëmija nuk ka dhënë shenja jete.
Burimet bëjnë të ditur se gjyshja e vogëlushit, prindërit e të cilit ndodheshin në Pogradec, ka qenë duke punuar. Në këto rrethana, 3-vjeçari është shkëputur dhe ka shkuar drejt pishinës ku dhe humbi jetën.
Trupi i vogëlushit është dërguar në morgun e spitalit të Durrësit ku po i nënshtrohet autopsisë mjeko-ligjore.
Në një prononcim për Neës24, punonjësi i hotelit Idai Zaka tha se fëmija kishte ardhur në hotel së bashku me gjyshen e tij.
“Atë e kishte marrë gjyshja e vet, e cila ishte punësuar këtu për t’u bërë gati me punimet për sezonin veror. Ajo e ka lënë fëmijën në katin e parë dhe është ngjitur lart në katin e dytë. Më pas ajo nuk po e gjente. Ne shkuam tek pishina dhe e gjetëm brenda në pishinë. Kur e nxorëm nga uji u munduam ti japim ndihmën e parë, por ai nuk kishte shenja jete”- ka thënë punonjësi i hoteli.
*Fotoja është ilustruese
