Gjyqtarja e Tiranës, Arnisa Këlliçi e cila vetëm pak ditë më parë vuri në dijeni Këshillin e Lartë Gjyqësor se është kërcënuar dy herë, një herë në mënyrë indirekte dhe një tjetër përmes një letre anonime, ka kallëzuar në prokurori personin që dyshon se fshihet pas këtyre kërcënimeve.
Sipas magjistrates, një prej kërcënimeve të mbërritura tek ajo përmes kancelarit të gjykatës, është bërë nga Prokurori i Tiranës, Adriano Dyrmishi.
Gjyqtarja pretendon se Dyrmishi është personi qe e ka vizituar atë në zyrën e saj ditën që i ka mbërritur letra me përmbajtje kërcënuese nga kancelari.
“Pas identifikimit nga hetimet e deritanishme të datës se kur letra kërcënuese e ardhur kundrejt meje është përcjellë në zyrën time, kam bërë me dije se Prokurori ka qenë pikërisht në atë datë në zyrën time”.
Lidhur me këto pretendime, tashmë të përkthyera në kallëzim penal, Tv Klan kontaktoi prokurorin Adriano Dyrmishi i cili la të kuptohej se akuzat nuk qëndronin.
“Nuk kam asnjë reagim për këto akuza, por e vërteta e tyre do të dalë shumë shpejt”.
Kallëzimi i gjyqtares Arnisa Këlliçi është depozituar më datë 26 Janar në Prokurorinë e Tiranës, por ajo ka kërkuar që çështja të shqyrtohet nga një prokurori tjetër. Mbi bazën e kallëzimit të depozituar në KLGJ, gjyqtarja është marrë në mbrojtje nga policia për një afat 3 mujor./ TV Klan
