Gjyqtarja e Gjykatës së Lartë, Majlinda Andrea është shpallur në kërkim nga ana e Policisë, pasi akuzohet për korrupsion.
Me anë të një deklarate për mediat, Prokuroria ka bërë me dije se gjyqtarja Andrea bashkë me bashkëshortin e saj, Odhise Andrea janë arratisur nga Shqipëria, pasi u vunë në dijeni se Gjykata e Lartë kishte caktuar masën e arrestit me burg ndaj tyre.
Gjyqtarja Andrea akuzohet se ka marrë 50 mijë euro për të dhënë vendim në favor të një shtetaseje në një çështje të sajën.
Ndërkaq, për korrupsion është akuzuar edhe i shoqi, mësohet se ka luajtuar rolin e sekserit.
“Masa e sigurimit për bashkëshortët Andrea nuk është mundur të ekzekutohet, pasi ata janë larguar jashtë Shqipërisë pak orë para se Gjykata e Lartë të vendoste masat e sigurimit ndaj tyre”, shkruan Prokuroria.
Nga burime konfidenciale të Opinion.al, është mësuar se ka pas rrjedhje informacioni nga institucioni që ka përpiluar dosjen e dy bashkëshortëve.
Ndërkohë, janë arrestuar nga ana e Policisë së Shtetit, tre të dyshuarit Ilia Çabiri, Petraq Dashi dhe Eleni Lino.
Këta tre shtetas dyshohet se i kanë paguar gjyqtares Majlinda Andrea 50 mijë euro për të dhënë një vendim në favor të tyre, në një proces njohjeje prone që ishte në shqyrtim në Gjykatën e Lartë.
Shuma e parave dyshohet se i është dhënë gjyqtares nëpërmjet bashkëshortit të saj, Odhise Andrea.
