TIRNAË- Edhe këtë të martë ka dështuar seanca gjyqësore ndaj imamëve të vetëshpallur, të akuzuar se kanë rekrutuar dhe dërguar shqiptarë për të luftuar në Siri.
32 seanca janë zhvilluar në total dhe 7 të fundit kanë dështuar për shkak të kërkesave pa u mbështetur në Kodin e Procedures të të pandehurve dhe për shkak të largimit të tyre në shenjë proteste nga salla.
Ata akuzojnë prokurorinë për manipulim të provave dhe gjykatën për njëanshmëri. Në seancën e radhës ata kërkuan pavlefshërinë e akteve ku njoftohet shtyrja e afatit të hetimit. Sipas të pandehurve nuk janë njoftuar për këtë dhe ky dokument nuk është firmosur nga ata, duke ngritur dyshime për falsifikm të firmave.
Por kjo gjë u kundërshtua nga prokuroria duke argumetuar se njoftimi është bërë konform ligjit. Edhe gjykata nuk i mori në konsiderate kërkesat duke i rrëzuar ato.
Pas kësaj të gjithë të pandehurit janë larguar në shenjë proteste nga salla duke hedhur akuzat mbi trupën gjyqësore. Ndodhur në këto kushte gjykata u detyrua të ndërpriste gjyqin.
Sakaq në nisje të seancës u vendos të mos lejohet të xhirohet gjyqi nga kamerat e televizioneve. Ky vendim u mor nga trupa gjyqësore, duke u argumentuar si masë për shkaqe sigurie.
