Vendimi i djeshëm i Gjykatës Administrative Tiranë që ka rrëzuar vendimin e Këshillit të Ministrave për shpalljen e malit të Tomorrit “Park Kombëtar”, ka shkaktuar reagime të shumta në qarkun e Beratit.
Këtë të shtunë, banorët janë ngritur në protestë. Me ta është bashkuar edhe ministri i Turizmit, Blendi Klosi, si dhe drejtues të pushtetit vendor.
Me pankartat në duar: “Mos ma prek Tomorrin”, “Tomorri park natyror”, “Do ju përgjigjet vetting-u dhe Abaz Aliu”, “Jo shkatërrimit të malit” etj, banorët kanë kërkuar rrëzimit e vendimit të Gjykatës Administrative.
Ministri i Turizmit, Blendi Klosi ka pohuar se lufta për të mbrojtur pasuritë natyrore është e vështirë por një luftë e drejtë. Klosi deklaroi nga Berati se, do ta rrëzojë vendimin që morën 5 gjyqtarët e Gjykatës Adminiatrative, që votuan 4 pro dhe 1 kundër për rrëzimin e VKM-së për malin e Tomorrit.
Klosi deklaroi se, 4 gjyqtarët: Amarildo Laçi, Bari Shyti, Arkelino Gazidede dhe Fjoralba Shehu do të përballen me peticionin e qytetarëve të të gjithë qarkut të Beratit./ Opinion.al
