Gjykata e Krimeve të Rënda ka kthyer për hetimet të mëtejshme dosjen e pagëzuar me emrin “Toyota Yaris”.
Në këtë dosje po hetohen katër të arrestuarit Agim Çeka, Alban Mollaymeri, Edi Lika, Klevi Lika dhe dy të shpallurit në kërkim Alfred e Elvis Vladi për sjelljen në Shqipëri të 3.4 milionë eurove të sekuestruara në dy automjete “Toyota Yaris”.
Sot kanë mbërritur dy letërporosi nga Belgjika dhe Italia në lidhje me këtë cështje dhe janë ende të papërkthyera. Bazuar në këto rrethana gjykata ka kthyer sërish dosjen në Prokurorinë e Krimeve të Rënda për hetime të mëtejshme.
Çështja “Toyota Yaris” po hetohet në Shqipëri dhe në Belgjikë. Kujtojmë që për të ka dëshmuar në prokurori edhe kreu i opozitës Lulzim Basha i cili e denoncoi këtë rast nga foltorja e Kuvendit. Ai është pyetur në prani të prokurorëve belg mbi dijeninë e tij për sasinë e parave që ishin transportuar në Shqipëri. Për sasinë e parave të sekuestruara kreu i opozitës ka akuzuar deputetin socialist Taulant Balla se do të garantonte transportin e tyre. /Opinion.al
