Gjykata e Krimeve të Rënda ka dhënë masat e sigurisë për anëtarët e grupit “Bajri”. Kështu në “arrest burg” janë lënë: Safet Rustemi, Ilir Rustemi, Astmer Bilali, Ismet Idrizi, Behar Bajri. Mikeshës së Behar Bajrit, Jorida Muratit iu ndryshua masa e sigurisë nga arrest me burg në arrest shtëpie.
Për mjekët Senad Halluni, Florine Hoxha dhe Mira Nikaj nga arrest shtëpie hetimet do të vijojnë në masën detyrim paraqitjeve, teksa i vetmi në kërkim është Sirjan Alija.Gjatë seancës në Krimet e Rënda, Safet dhe Behar Bajri kanë mohuar akuzat e reja të ngritura nga prokuroria.
“Gjithçka e kemi nga Anton Martini (Ka qenë prokuror në Shkodër para dy vitesh). Janë akuza të sajuara, duan të na mbajnë në burg me çdo kusht. Mos na mbani pa të drejtë” mësohet se kanë thënë ndër të tjera Behar dhe Safet Bajri, kushërinj të parë.
4 anëtarët e grupit Bajri u arrestuan në kuadër të operacionit “Oaz”, ndërsa akuzohen për gjobvënie dhe punësim në OSHEE e spitale. Po sipas hetimeve, anëtarë të grupit Bajri, në bashkëpunimin me njëri-tjetrin kanë përfituar shuma parash nëpërmjet kanosjes dhe shtrëngimit ndaj dy shtetasve.
Sakaq në një deklaratë për mediat, avokati i i grupit “Bajri”, Arbër Hoxhaj, i ka quajtur pretendimet e ngritura si një flluskë sapuni ndërsa bëri me dije se do ta apelojë vendimin. Hoxhaj deklaroi se “nuk ka akuza, por dyshime”.
“Vendimi i Gjykatës sot është një instrument ekstra procedural, në kundërshtim me ligjin procedural penal. Nuk ishte rastësi që ditën që ne kërkuam shuarjen e masave të sigurimit për Safet Bajrin, Ilir Bjarin, Imset Idrizi dhe Asmer Bilali kjo gjykatë cakton katër masa të reja, të cilat vetëm të reja nuk mund të quhet.Mund të themi me bindje të potë që dosja Bajri është një flluskë sapuni dhe Prokuroria e di po aq mirë sa ne që kjo do të plasë në momentin e parë që do të hetohet me themel. Janë të njëjtat shkaqe për të cilat është vënë vendimi në 2018, dhe pasi është shuar masa e sigurimit nxirret një masë e ere për ti mbajtur të paraburgosur për të zgjatur hetimet”./ Opinion.al
