Gjykata e Tiranës ka rrëzuar kërkesën e prokurorisë për të hetuar ILDKP-në. Dhe është pranuar kërkesa e ILDKPKI për “heqje të masës së sekuestros” ndaj dokumenteve të bllokuara nga Prokuroria. Vendimi është marrë nga gjyqtari Julian Haxhiu, raporton “Panorama”.
Në datat 6 dhe 7 nëntor, pas një hetimi të nisur kryesisht, Prokuroria lëshoi urdhra sekuestrimi për dosjet që ILDKPKI ka pasur në tri vitet e fundit ndaj deputetëve Koço Kokëdhima, Valentina Leskaj, Rakip Suli etj., të cilët janë akuzuar për konflikt interesi. Pikërisht pas sekuestrimit të dokumenteve në fjalë, duket se ILKDPKI ka reaguar menjëherë duke bërë padi në Gjykatë kundër vendimit të Prokurorisë.
Gjykata është vënë në lëvizje menjëherë dhe vetëm katër ditë pas padisë së Inspektoriatit, i ka hequr të drejtën Prokurorisë që t’i përdorë dokumentet në fjalë si provë në procesin penal të nisur me akuzën e shpërdorimit të detyrës.
