Zhvillimi i seancave gjyqësore në Durrës është kthyer në një sfidë të vërtetë si për qytetarët ashtu edhe për gjyqtarët. Në këtë institucion, mungojnë sallat me standarde duke bërë që më shumë se gjysma e seancave të zhvillohen në zyrat e gjyqtarëve.
Në një intervistë për ABC News, Kryetarja e Gjykatës së Durrësit, Joana Qeleshi ka thënë se:
“Zyrat e gjyqtarëve janë shumë të vogla, humbet transparenca, humbet solmenitetki i gjykimi dhe siguria është shumë e ulët. Kemi pasur situata ku në sallë ka pasur momente tensioni mes palëve në proces dhe në organikë nuk ekzistojnë punonjës sigurie për çdo sallë, potencialisht mund të ndodhin situata problematike, mund të vënë jo vetëm në rrezik palët në proces, por dhe gjyqtarët e prokurorët.”
Problem është edhe organika e këtij institucioni, pasi çështjeve të shumta që presin për t’u gjykuar nuk u përgjigjet numri i gjyqtarëve. Një gjyqtar është i detyruar të ndjekë 14 çështje në ditë.
Në këto kushte gjykata e rrethit Durrës, mbetet në pritje të zbatimit të projektit të godinës së re, e cila është miratuar nga Këshilli Bashkiak që në dhjetor të vitit 2015, për të përmbushur standardet e vendeve të Bashkimit Europian për dhënien e drejtësisë./Opinion.al
