Gjykata e Posaçme kundër Korrupsionit dhe Krimit të Organizuar ka lënë në fuqi masën e sigurisë “arrest në burg” për Jorgo Goron, kryebashkiakun në detyrë të Himarës të arrestuar tre ditë më parë për akuzën “shpërdorim detyre”.
Goro u arrestua me urdhër të SPAK më 23 mars, pasi akuzohet nga Prokuroria e Posaçme për tjetërsim prone.
Ndërsa për drejtorin e Kadastrës, Bilbil Aliaj, trupa gjykuese vendosi ndryshimin e masës nga “Arrest shtëpie” në “detyrim paraqitje”.
Në seancë, ai tha se nuk ka njohje me investitorin e tokës për të cilën bëhet fjalë.
“Nuk kam patur asnjë kontakt apo njohje me investitorin Artan Gaçi, apo me persona të tjerë të lidhur me të. Nuk kam patur sugjerime, udhëzime apo ndërhyrje lidhur me këtë çështje përfshirë dhe Jorgo Goron. Më ka ardhur një praktikë si titullar, e përpiluar nga punonjësit përkatës, siç ndodh zakonisht ku janë ekspertët dhe stafi përpilues, të cilën e kam firmosur si titullar”, ka thënë Aliaj.
Në masën “arrest shtëpie” janë lënë Vezir Gjikoka ish-jurist, Jerasimo Bashi ish-drejtori i Drejtorisë së Mbrojtjes dhe Menaxhimit të Tokës, Bashkia Himarë.
Ndërsa për pronarin e tokës, Stavri Mëhilli i cili dyshohet për kryerjen e veprës penale “Falsifikimi i dokumenteve”, më shumë se një herë, dhe “Falsifikimi i vulave, i stampave, ose i formularëve”, më shumë se një herë u vendos masa “arrest në burg” në mungesë./Opinion.al
