TIRANE- Qeveria dha me koncension shërbimin e dializës me pretekst shtrirjen e këtij shërbimi në gjithë vendin. Por apo e marrin pacientët e sëmurë me veshka këtë shërbim tani pranë qyteteve ku banojnë dhe me çfarë kostoje?
Vlera e koncensionit është 8 622 931 792 lekë me një afat 10 vjeçar dhe përfitues është spitali Amerikan.
Siç parashikohet në kontratë, ky spital duhet të kryejë investime në 5 qendra të spitaleve rajonalë; Shkodër, Lezhë, Vlorë, Korçë dhe Elbasan.
Sipas marrëveshjes kjo kompani duhet të bëjë investime dhe të përmirësojë ambientet bazuar në standardet më të larta dhe ofrimin e shërbimit sa më pranë qendrave të banimit të pacientëve.
A ishte abuziv ky koncension?
Dyshimet janë të mëdha; E para për faktin se u dha në mënyrë klienteliste; E dyta sepse aktualisht dializa ofrohet në QSUT, në Elbasan, në Shkoder, në Gjirokaster, si edhe me out-sourcing në Durres, Fier dhe Tiranë nga Spitalit Amerikan dhe Hygea.
Pra çfarë do të sjellë më shumë ky koncension me vlerë 8.6 miliardë lekë?
Ekspertët thonë se dhënia me koncesion e këtij shërbimi nga Ministria prek spitalin si ndërmarrje, centralizon gjithë këtë shërbim. Rruga më e mirë, thonë ekspertët është kontraktimi direkt i këtyre shërbimeve nga spitalet e rajonit përkates përmes formës out-sourcing.
Ky koncesion po krijon një monopol të ri në vend, duke mos lënë hapësira për futjen e operatorëve të rinj me oferta financiare dhe cilësi më të mira.
Le të shkojmë tek çmimi. Sipas ekspertëve të fushës, në rajon ka ardhur duke u ulur çmimi për këtë shërbim, ndërsa në vendin tonë për një periudhë të gjatë 10 vjeçare do të jetë me çmim të lartë.
Sakaq ende nuk dihet se çfarë do të ndodhë me personelin aktual të hemodializës dhe me investimet që ka bërë shteti për repartet e hemodializës në Elbasan, Shkodër, Gjirokastër. /Opinion.al
