Ish-ministri Damian Gjiknuri ka pranuar kërkesën e deputetit Ralf Gjonin, të largohej nga detyra si bashkëkryetar i Komisionit të Reformës Zgjedhore.
Gjiknuri ironizoi opozitën parlamentare duke e krahasuar me PD-në dhe LSI-në që kanë braktisur Kuvendin: “Ata kishin ‘Rama ik’, këta këtu paskan Damian ik”.
Ai u shpreh i gatshëm të vetëofrohej për zgjidhje, duke lënë të hapur mundësinë e dorëheqjes, nëse në atë Komision do të hynte edhe Partia Demokratike.
“Nëse vjen Partia Demokratike në Komisionin për Reformë Zgjedhore, patjetër, nga ‘Rama ik’ në ‘Damian ik’, unë vetëofrohem si presidenti për zgjidhje”, u shpreh Gjiknuri nga foltorja e Kuvendit.
Komisioni i Reformës Zgjedhore ka dy kryetarë, Damian Gjiknurin nga mazhoranca dhe Rudina Hajdarin nga opozita.
Edhe Partisë Demokratike i është lënë një vend për t’iu bashkuar komisionit, por ftesa është refuzuar deri më tani nga demokratët./ Opinion.al
